ភ្នំពេញ៖ បុរសម្នាក់ត្រូវបានគេប្រទះឃើញដេកស្លាប់ក្នុងថ្លុកឈាម ដោយសាកសពស្ទើរតែដាច់ក្បាលចេញពីខ្លួន ហើយនៅក្បែរសាកសពមានដាវសាំម៉ារ៉ៃមួយដើម ដោយសង្ស័យថាជាអំពើឃាតកម្មកាប់សម្លាប់ជនរងគ្រោះយ៉ាងឃោរឃៅ។

សាកសពជនរងគ្រោះត្រូវបានគេប្រទះឃើញនៅក្នុងទីតាំងលាងរថយន្តដែលគេទុកចោលមួយកន្លែងស្ថិតក្នុងសង្កាត់ដង្កោ ខណ្ឌដង្កោ នៅព្រឹកថ្ងៃទី២៦ ខែធ្នូ ឆ្នាំ២០២២។

អធិការដ្ឋាននគរបាលខណ្ឌដង្កោ លោកវរសេនីយ៍ឯក ជឹម ស៊ីថា បានបញ្ជាក់ប្រាប់អង្គភាពសារព័ត៌មាន EAC news ឱ្យដឹងថា សាកសពជនរងគ្រោះត្រូវបានជនសង្ស័យមិនស្គាល់អត្តសញ្ញាណកាប់ចំក្បាល កំភួនជើង និងកាប់ចំ-ក ស្ទើរតែជិតកាត់ក្បាលចេញពីខ្លួន។

បើតាមអធិការដ្ឋាននគរបាលខណ្ឌដង្កោ សមត្ថកិច្ចមិនទាន់ស្គាល់អត្តសញ្ញាណជនរងគ្រោះនៅឡើយទេ ហើយសមត្ថកិច្ចកំពុងតែស្វែងរកសាច់ញាតិ ខណៈជនរងគ្រោះត្រូវបានសមត្ថកិច្ចជំនាញបញ្ជូនមកវត្តចាក់អង្រែក្រាម។

លោកបន្តថា ជាមួយគ្នានេះសមត្ថកិច្ចកំពុងតែស្រាវជ្រាវរកជនល្មើសដើម្បីយកមកផ្តន្ទាទោសទៅតាមផ្លូវច្បាប់៕